Irani dhe Rusia do të kryejnë manovra detare në Detin e Omanit të enjten, pas raundit të fundit të bisedimeve mes Teheranit dhe Uashingtonit në Gjenevë, raportuan mediat iraniane. Të hënën, Garda Revolucionare, krahu ideologjik i ushtrisë së Iranit, nisi gjithashtu stërvitje në Ngushticën strategjike të Hormuzit, një sfidë për forcat detare amerikane të vendosura në rajon. "Stërvitja e përbashkët detare e Republikës Islamike të Iranit dhe Rusisë do të zhvillohet të enjten në Detin e Omanit dhe në Oqeanin Indian verior", raportoi agjencia ISNA, duke cituar një zëdhënës të stërvitjes. "Qëllimi është të forcohet siguria detare dhe të thellohen marrëdhëniet mes marinave të dy vendeve", tha ai, pa specifikuar kohëzgjatjen e stërvitjes. Lojërat e luftës vijnë ndërsa Irani mori një ton optimist pas raundit të dytë të negociatave të ndërmjetësuara nga Omani në Gjenevë të martën. Bisedimet e mëparshme mes dy armiqve dështuan pas sulmit të paprecedentë izraelit ndaj Iranit në qershor 2025, i cili shkaktoi një luftë 12-ditore në të cilën Shtetet e Bashkuara u bashkuan për një kohë të shkurtër. Presidenti amerikan Donald Trump, ka vendosur një forcë të konsiderueshme detare në rajon, të cilën e ka përshkruar si një "armadë", me një aeroplanmbajtëse të dytë që pritet të mbërrijë shumë shpejt. Kjo ka bërë që të rritet frika për një sulm të mundshëm mbi Iranin që mund të shndërrohet shumë shpejt në një luftë të përgjithshme në rajon.