Më shumë se 300 persona kanë vdekur dhe dhjetëra të tjerë rezultojnë të zhdukur pas përmbytjeve dhe rrëshqitjeve të dheut në Indonezi, që është goditur gjithashtu dhe nga një tërmet. Shirat musonikë gjatë javës së kaluar bënë që lumenjtë të dilnin nga shtrati në provincën e Sumatrës Veriore. Përmbytja përshkoi fshatrat malore, ndërsa rrëmbeu njerëz dhe shkatërroi mijëra shtëpi dhe ndërtesa, tha Agjencia Kombëtare e Menaxhimit të Fatkeqësive. Ndërsa ekipet e shpëtimit vazhduan përpjekjet e tyre të shtunën, autoritetet thanë se numri i të vdekurve ishte rritur në të paktën 303 persona, ndërsa pritet që shifra të rritet akoma dhe më shumë. Vende të tjera të Azisë Juglindore, përfshirë Tailandën, Malajzinë dhe Sri Lankën, janë prekur gjithashtu nga shirat e rrëmbyeshëm javën e fundit, me emergjencat që po punojnë për të shpëtuar qytetarët e bllokuar, dhe për të rikthyer komunikimin me zonat e goditura. Të premten, qeveria tajlandeze tha se 145 persona kishin humbur jetën nga përmbytjet në tetë provinca jugore, ndërsa dy vdekje janë konfirmuar edhe në Malajzi. Sri Lanka, në Azinë Jugore, ka regjistruar gjithashtu 46 vdekje si pasojë e stuhive, thanë autoritetet.