Sergei Chemezov, një aleat i ngushtë i presidentit rus Vladimir Putin, thotë se Shtetet e Bashkuara dhe aleatët e saj perëndimorë rrezikojnë të shkaktojnë një luftë globale nëse Uashingtoni vazhdon të "provokojë" konfliktin në Ukrainë dhe të lejojë Kievin të sulmojë territorin rus me armë amerikane. Komentet e tij për agjencinë e lajmeve Reuters ofrojnë një pasqyrë të rrallë të të menduarit në rrethin e brendshëm të Putinit pas një inkursioni të papritur ukrainas në rajonin e Kurskut në Rusi, për të cilin presidenti rus ka premtuar një përgjigje "të denjë", por nuk ka thënë ende se çfarë do të sjellë kjo. Chemezov, CEO i korporatës Rostec, e cila siguron shumë nga armët ruse për luftë, tha se Rusia ndihej e sigurt dhe kishte armë të mjaftueshme për më shumë se dy vjet në atë që Kremlini e quan operacionin e tij special ushtarak në Ukrainë. Ai përsëriti qëndrimin e Kremlinit se konflikti është një betejë midis Perëndimit dhe Rusisë. "Në një situatë ku Perëndimi, i udhëhequr nga Shtetet e Bashkuara, provokon luftë, ne duhet të jemi gati," tha Chemezov. “Viti i tretë i operacionit special është duke u zhvilluar dhe Rusia ndihet e sigurt”. Ai tha se askush nuk mund të jepte një afat kohor se kur mund të përfundojë lufta dhe akuzoi SHBA-në për nxitjen e konfliktit duke furnizuar me armë Kievit dhe duke lejuar sulme thellë në Rusi. "Sa më tej shkon, aq më i madh është rreziku që bota të tërhiqet në një konflikt global. Duket e çuditshme, por vendet perëndimore nuk duket se e kuptojnë se sa e rrezikshme është kjo për ta." Komentet e Chemezov, një ish-gjeneral i KGB-së, i cili shërbeu me Putinin në Gjermaninë Lindore përpara rënies së Bashkimit Sovjetik, erdhën pasi ukraina cau kufirin në kursk, dy javë më parë dhe ka marrë tani në kontroll qindra kilometra katror territor. Putin tha javën e kaluar se forcat ruse do ti dëbonin trupat ukrainase nga territori sovran rus, por ato mbeten ende brenda Rusisë.