Komuna e Kërçovës në Maqedoninë e Veriut, tashmë pas 16 vitesh, do të drejtohet nga maqedonasit e jo një kryetar shqiptar. Aleksandër Jovanovski, nga VMRO-DPMNE, ka arritur të mposhtë në balotazh, Fatmir Deharin e Aleandës Kombëtare për Integrim, të drejtuar nga BDI e Ali Ahmetit, duke marrë nga duart e shqiptarëve qeverisjen e Kërçovës. Nga rezultateve të para jozyrtare, Jovanovski ka siguruar një epërsi prej rreth 2.000 votash, duke arritur kështu një fitore të thellë që shënon një ndryshim historik në balancat politike të kësaj komune, kjo edhe falë përçarjes së partive shqiptare. Edhe 4 vite më parë, në zgjedhjet e 2021, gara ishte po mes Deharit e Jovanovskit, por që Dehari do të arrinte të triumfonte. Sipas analistëve vendas, përmbysja e rezultatit reflekton një mobilizim të madh të elektoratit maqedonas dhe një pjesëmarrje më të ulët të votuesve shqiptarë, përfshirë edhe ata nga diaspora.