Liderja e Dhomës së Përfaqësuesve në Shtetet e Bashkuara, Nancy Pelosi u ka kërkuar anëtarëve të kongresit të kthehen në një seancë për të votuar legjislacionin që do të ndalonte ndryshimet në Shërbimin Postar, pas reformave të prezantuara nga drejtori i këtij departamenti, njëherësh aleat i presidentit amerikan, Donald Trump. Demokratët, që kanë shumicën në Dhomën e Përfaqësuesve, kanë shprehur shqetësime se reformat janë pjesë e përpjekjeve për të dëmtuar Shërbimin Postar, në kohën kur votimi përmes postës mund të lehtësojë procesin për shumë njerëz që ngurrojnë të shkojnë në qendrat e votimit, për zgjedhjet presidenciale më 3 nëntor. “Në kohë pandemie, Shërbimi Postar është Qendër Zgjedhore”, u ka thënë Pelosi kolegëve të saj. “Jeta dhe demokracia amerikane po kërcënohen nga presidenti”.