Presidenti amerikan, Joe Biden, tha se po ia kalon stafetën një brezi të ri, ndërsa u shpjegoi amerikanëve largimin e tij të papritur nga gara presidenciale gjatë një fjalimi mbrëmjen e së mërkurës nga Shtëpia e Bardhë. “Unë e nderoj këtë zyrë”, tha presidenti Biden. “Por, unë e dua më shumë vendin tim”. Biden, 81 vjeç, i bëri ballë presionit disa javor të demokratëve për t’u tërhequr nga gara për Shtëpinë e Bardhë pas debatit katastrofik të 27 qershorit. Gjatë një interviste pas debatit ai kishte thënë se vetëm “Zoti” mund ta bindë të tërhiqet nga gara. “Kam vendosur se mënyra më e mirë përpara është t'ia kaloj stafetën një brezi të ri. Kjo është mënyra më e mirë për të bashkuar vendin tonë” Presidenti Biden e mori vendimin disa ditë pasi shqyrtoi parashikimet e sondazheve se ai mund të humbiste përballë republikanit Donald Trump në zgjedhjet e nëntorit dhe të dëmtonte edhe shanset e fitores së zgjedhjeve të ligjvënësve demokratë.