Plani i qeverisë për t’iu dhënë pasaporta shqiptare shtetasve të huaj, të cilët duan të investojnë në Shqipëri, ka sjellë reagime të shumta ditët e fundit. Përvec Bashkimit Europian, i cili tha se kjo lëvizje e qeverisë shqiptare do të nxisë krimin e organizuar dhe pastrimin e parave, jehonë këtij projekti i kanë bërë edhe mediat holandeze, të cilat thonë se me këtë propozim, Edi Rama po vë në rrezik anëtarësimin e Shqipërisë në Bashkimin Evropian. Media holandeze, ‘Sargasso’ thotë se propozimi i kryeministrit shqiptar po shihet me shqetësim nga Bashkimi Evropian sepse kjo praktikë rrezikon t’i hapë rrugë skemës së pastrimit të parave. “Çfarë ka për të ofruar Rama? Përjashtim nga taksat në kurriz të buxhetit të shtetit? A mos është një rrugë për pastrimin e parave? Kjo e fundit bie në kundërshtim me politikat e BE-së, si ato ndaj praktikave të Qipros dhe Maltës. Në Shqipëri, pasaportat e arta janë parë me shqetësim, sepse në thelb kjo është çështje sigurie.”, shkruan Sargasso në artikullin kushtuar cështjes së pasaportave të arta.