Kryebashkiaku i Lushnjës, Fatos Tushe, por edhe zyrtarë të tjerë të kësaj Bashkie kanë nisur të frikësohen nga SPAK, në momentin kur Policia Gjyqësore ka sekuestruar dokumentacionin e tenderit për rehabilitimin e kanalit ujitës disa muaj më parë. Në dosjen e Prokurorisë së Posaçme theksohet se në një bisedë të zhvilluar më 20 janar të këtij viti, mes Tushes dhe biznesmenit Ibrahim Lami, ata shfaqen të shqetësuar teksa diskutojnë për ardhjen e SPAK-ut. Për këtë arsye vendosin të flasin në aplikacionin “ËhatsApp” për një komunikim më të sigurt, duke pasur frikë nga ndonjë përgjim i mundshëm. Nga ana tjetër, edhe juristja Blerta Turku, teksa bisedon me një person, nuk e fsheh shqetësimin, pasi SPAK e ka thirrur bashkë me 2 të tjerë, si persona që kanë dijeni. Për këtë ajo bisedon edhe me drejtorin e saj, Flamur Peqinin, të cilit i tregon për shkresën që ka mbërritur aty nga Policia dhe Prokuroria. Ndërsa ai i thotë se do të shkonte aty, pasi në atë moment ishte me kryetarin. Policia Gjyqësore e ngarkuar me këtë hetim njoftohet se ka sekuestruar dokumentacionin e tenderit për rehabilitimin e kanalit ujitës. Të hetuarit e këtij procedimi, pasi vihen në dijeni të këtij fakti, shfaqen të shqetësuar. Në lidhje me këtë prokurim rezulton se disa prej punonjësve të Bashkisë Lushnjë që kanë marrë pjesë në këtë prokurim, janë thirrur për t’u pyetur nga organi procedues.