Vetëm pak minuta pas fjalës së gjatë të kryeministrit Rama në mbledhjen e Asamblesë së Partisë Socialiste ka reaguar presidenti Ilir Meta përmes dy mesazheve të njëpasnjëshme në rrjetin social facebook. Batutat e Ramës për dekoratat që jep Meta për ata që kanë vdekur përpara se vetë kreu i shtetit të vinte në jetë kanë marrë përgjigje. O shoku thirri mendjes! Unë e dua më shumë Margaritën se Monikën! E di pse? Se Monika braktisi Parlamentin kundër dëshirës dhe vullnetit tim, ndërsa Margarita në moshën 16-vjeçare shkruante në hartim: "Më pyet shpesh vëllai më i vogël: Motër përse na duhet Atdheu? Dhe unë i përgjigjem: Atdheu na duhet që të jemi të lirë!” Nuk ka Atdhe në botë pa Dëshmorë dhe Heronj o Spiropalist ordiner!” – shkruan Meta në mesazhin e tij të parë në facebook, ndërsa më tej në një tjetër status shkruan se nuk aktron me historinë e kombit dhe familjes time. Madje e quan Ramën, palaço dhe pa atdhe. Madje, flet edhe për vendlindjen e tij dhe se shtëpia e tij në Cepan të Skraparit ishte spital partizan për Jugun e Shqipërisë. Madje, me një gjuhë të ashpër Meta shkruan se ka qenë ndër udhëheqësit e Lëvizjes Studentore, por kurrë nuk e vuri në diskutim gjakun e tyre. Sepse, sipas tij, gjaku nuk bëhet ujë, duke i etiketuar të gjithë ata që kanë folur kundër tij si hajdutë ordinerë! Në fund, Meta bën një tjetër kërcënim, se do të më keni përballë.