Ndërsa shumë qytete të Evropës jugore janë lodhur nga turistët, Berlini po e paraqet veten si një antidot ndaj turmave, ndërsa valët e nxehtësisë përvëluese dhe protestat kundër turizmit po shkaktojnë probleme diku tjetër. Kryeqyteti gjerman po promovon skenën e tij të artit, pallatet prusiane dhe klubet e famshme të teknos për të nxitur një sektor turizmi që ka mbetur prapa në krahasim me bumin e pas pandemisë që u pa në pjesë të tjera të Evropës. "Ne vërtet nuk kemi problem me turizmin masiv", thotë Christian Taenzler, zëdhënës i bordit të turizmit VisitBerlin. "Qyteti është i madh dhe njerëzit janë të shpërndarë. Sidomos në verë, kur berlinezët janë larg, ka mjaft hapësirë", shton ai. Berlini, shtëpi e rreth 4 milionë njerëzve, tërhoqi 5.9 milionë vizitorë në gjysmën e parë të vitit sipas zyrës së statistikave. Kjo shënon një rënie prej 1.8% krahasuar me një vit më parë. Mbushja e hoteleve ishte mesatarisht 52.8% gjatë së njëjtës periudhë, duke mbetur pas 65%-shit të Madridit dhe 79%-shit në Paris, qytete ku turizmi është rimëkëmbur më shpejt. Në vitin 2019, para pandemisë, Berlini tërhoqi gati 14 milionë turistë. Turizmi gjeneroi 4.6% të prodhimit të brendshëm bruto të Berlinit në vitin 2023. Në krahasim, turizmi përbën afërsisht 14% të ekonomisë lokale në Paris dhe Romë, dhe 8% në Madrid. Sidoqoftë, disa borde turistike shpresojnë se trendet e klimës do ta zhvendosin kërkesën drejt veriut në vitet që vijnë. Një studim i Qendrës së Përbashkët të Kërkimit të Komisionit Evropian zbuloi se valët e të nxehtit po i bëjnë destinacionet jugore më pak tërheqëse në kulmin e verës. Berlini, ku temperatura maksimale e verës është rreth 25 gradë celcius, duhet të tërheqë turistët që kërkojnë klima më të freskëta. Por gjithcka mbetet për tu parë.