Misioni Pameca 5 ka përmbyllur ciklin e tij në Shqipëri. Këtë të martë ministri i brendshëm Bledi Çuçi, dekoroi ekspertët e huaj, të cilët udhëhoqën këtë projekt. Medalje nderi ju akordua Carlo D’Achille, drejtuesit të misionit Pameca 5 në Shqipëri, me propozim të drejtorit të përgjithshëm të policisë, Gledis Nano. Njëherësh me D’Achille, u dekoruan edhe ekspertët afatgjatë të Projektit PAMECA V, Gilles Loçhi, Giovanni Pasqua dhe Maurizio Mirarchi. Kujtojmë se projekti Pameca 5 është një projekt i asistencës teknike i financuar nga Bashkimi Europian, i cili nëpërmjet ekspertizës së tij nga shtetet anëtare të Bashkimit Europian, ndihmoi agjencitë kryesore të zbatimit të ligjit shqiptar. Objektivat e këtij misioni janë lufta proaktive kundër krimeve të rënda, krimit të organizuar, trafiqeve, terrorizmit dhe menaxhimin e kufirit, si edhe për përafrimin me standardet evropiane të policimit, si faktorë kyç në përmbushjen e kritereve dhe prioriteteve në kuadër të integrimit të plotë të vendit tonë në BE. Policia e Shtetit bën me dijie se projekti PAMECA V pritet të ndiqet nga një projekt pasardhës në fushën e agjencive ligjzbatuese.