Presidenti i Afrikës së Jugut, Cyril Ramaphosa, ka kërkuar hetim për rrethanat në të cilat 153 palestinezë zbarkuan në aeroportin e Johanesburgut të enjten në mëngjes me një fluturim nga Nairobi. 153 burra, gra dhe fëmijë mbetën në aeroplan, të ndaluar nga policia kufitare për më shumë se 12 orë sepse pasaportat e tyre nuk kishin vulë daljeje nga Izraeli. Departamenti i Punëve të Brendshme më në fund miratoi hyrjen e pasagjerëve në Afrikën e Jugut, pasi mori garanci nga OJQ-ja jugafrikanase "Gift of the Givers" se do të kujdesej dhe do të siguronte strehim për palestinezët. "Këta janë banorë të Gazës të cilët, në një mënyrë mjaft misterioze, hipën në një aeroplan që ndaloi në Nairobi dhe më pas zbarkoi këtu", tha presidenti i Afrikës së Jugut. Nga 153 palestinezë që mbërritën të enjten, 130 hynë në vend me viza të përkohshme 90-ditore dhe 23 të tjerët vendosën të marrin fluturime lidhëse për në destinacione të tjera. Sipas ambasadës palestineze në Afrikën e Jugut, udhëtimet e "u organizuan nga një organizatë e paregjistruar, e cila shfrytëzoi kushtet tragjike humanitare të popullit në Gaza, duke mashtruar familjet, pasi u mori shuma parash për t’u mundësuar një udhëtim ilegal”.