Për disa netë në javë, Daria Slavytska merr një dyshek joge, batanije dhe ushqim, i fut në një karrocë fëmijësh dhe zbret bashkë me djalin e saj dy vjecar në metronë e Kievit. Ndërsa sirenat e sulmeve ajrore gjëmojnë, 27-vjeçarja përpiqet të bëjë disa orë gjumë të sigurt nën tokë. Gjatë dy muajve të fundit, Rusia ka kryer sulme me dronë dhe raketa gjatë natës në Kiev në një ofensivë verore që po e tendos mbrojtjen ajrore të qytetit dhe që i ka lënë 3.7 milionë banorët e tij të rraskapitur dhe në ankth. Qytete dhe fshatra të tjerë kanë parë shumë më keq që kur Rusia nisi pushtimin e saj në shkallë të plotë në fillim të vitit 2022 - veçanërisht ato afër vijës së frontit. Shumë vendbanime janë dëmtuar ose pushtuar ndërsa Rusia përparon dhe mijëra njerëz i janë drejtuar kryeqytetit, që konsiderohet edhe si më i mbrojturi në vend. Por sulmet e rënda të këtyre kohëve të fundit po fillojnë të ndryshojnë gjendjen shpirtërore. Natën, banorët nxitojnë drejt stacioneve të metrosë thellë nën tokë, në skena që kujtojnë bombardimet gjermane "Blitz" të Londrës gjatë Luftës së Dytë Botërore. Sistemi i metrosë në kiev regjistroi 165,000 vizitorë gjatë netëve të qershorit, më shumë se dyfishi i 65,000 vizitorëve në maj dhe gati pesë herë më shumë se numri i qershorit të vitit të kaluar, tha shërbimi i tij për shtypin. Më shumë njerëz kërkojnë strehë atje për shkak të "shkallës dhe vdekshmërisë" së sulmeve, thotë për Reuters kreu i administratës ushtarake të Kievit, Tymur Tkachenko. Ai thotë se sulmet kanë vranë 78 banorë të Kievit dhe kanë plagosur më shumë se 400 në gjysmën e parë të vitit. Presidenti i SHBA-së Donald Trump përmendi sulmet e Rusisë në qytetet ukrainase kur njoftoi vendimin e tij për t'i ofruar Kievit më shumë armë, përfshirë raketat Patriot për të forcuar mbrojtjen e tij ajrore. "Është e pabesueshme që njerëzit të qëndrojnë gjithë kohën me frikën se një raketë mund të godasë apartamentin e tyre", tha Trump. Shkencëtarët dhe psikologët thonë ndërkohë se mungesa e gjumit po lë gjurmë në një popullsi të lodhur nga më shumë se tre vjet luftë.