Pasi qindra pager (pejxhera) shpërthyen njëkohësisht në të gjithë libanin, duke vrarë 12 persona e duke plagosur mijëra të tjerë, CNN raportoi se shpërthimet ishin rezultat i një operacioni të përbashkët midis shërbimit të inteligjencës izraelite, Mossad, dhe ushtrisë izraelite. Pothuajse saktësisht 24 orë më vonë, pajisjet radio që përdoreshin nga hezbollahu shpërthyen të mërkurën në të gjithë Libanin. Sulmet e dyshuara kundër grupit militant Hezbollah të mbështetur nga Irani janë më të fundit në një seri operacionesh të fshehta që qeveria e Izraelit refuzon t'i pranojë, por që dyshohet se janë kryer nga operativë izraelitë. Historia e supozuar e vendosjes së eksplozivëve në pajisjet telekomunikuese nga izraeli shkon pas deri në vitin 1972, kur vendi hebre u hakmorr për vrasjen e 11 izraelitëve në lojërat olimpike të Mynihut, nga grupi militant palestinez Shtatori i Zi. Izraeli filloi atëherë Operacionin "Zemërimi i Zotit" dhe kaloi vite duke gjurmuar ata që ishin përfshirë në Masakrën e Mynihut. Mahmoud Hamshari, përfaqësuesi i Organizatës për Çlirimin e Palestinës në Paris, ishte mes atyre që u vunë në shënjestër. Operativët e paidentifikuar hynë në shtëpinë e tij dhe i vendosën një bombë në telefon, përpara se një person tjetër, i prezantuar si gazetar italian, të organizonte një intervistë telefonike me Hamsharin. Kur ai hapi telefonin dhe u identifikua, bomba u aktivizua nga distanca. Në vitin 1996, Yahya Ayyash, prodhuesi i bombave të hamasit, u vra pasi telefoni i tij celular, i mbushur me 50- gramë eksploziv shpërtheu pranë kokës së tij. Ndërkohë, nga viti 2010, pesë shkencëtarë bërthamorë të iranit janë vrarë në atentate të ngjashme, ndërsa izraeli përpiqej të parandalonte kundërshtarin e tij më të madh që të shtinte në dorë bombën bërthamore. Ndërsa shumë nga këto atentate kanë një aspekt fantastiko-shkencor, ekspertët theksojnë se çdo operacion i këtij lloji kërkon nivele të larta të inteligjencës njerëzore, që ngre edhe pikëpyetje në lidhje me protokollet e sigurisë të kundërshtarëve të Izraelit.