Shërbimet online e kanë shndërruar vendin tonë në një lider në rajon dhe në një nga 10 vendet e para të Europës. Sipas një raporti të fundit të publikuara nga Kombet e Bashkuara, rezulton se Shqipëria renditet e 9-ta në Europë dhe e 19-ta në botë për dhënien e shërbimeve publike online. Lajmi është publikuar edhe nga kryeministri Edi Rama, i cili nëpërmjet një postimi në rrjetet sociale shprehet se “më e rëndësishme akoma, një lajm për të vërtetën e madhe dhe të mohuar masivisht, se Shqipëria e sporteleve me hekura, e turmave nëpër radha për të marrë një copë letër, e bakshisheve për çdo shërbim në sportel i takon të shkuarës”. Por i gjendur përballë kritikave dhe akuzave për shkak të sulmeve kibernetike, Rama shprehet: “Shumëkush flet përçart për sulmin kibernetik mbi Shqipërinë, duke harruar dy fakte të thjeshta, e para se jemi sulmuar pikërisht ngaqë jemi zhvilluar (po të ishim akoma me sportele në shi e në diell, s’do na sulmonin dot) dhe e dyta, se sulmi ka dështuar pikërisht sepse kemi investuar si duhet, duke bërë shumë me pak, e duke u renditur ndër vendet më të zhvilluara për shërbimet publike online”.