Policia e Korcës vijon operacionin Perimetri, që ka nisur prej shumë muajsh dhe është përqëndruar jo vetëm përgjatë kufirit të gjelbër, por edhe në akset rrugore rurale, apo nacionale. Paraditen e kësaj të hëne është goditur një tjetër rast i veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit. Një person u arrestua, teksa u kap duke transportuar 4 emigrantë të paligjshëm, vihet në pranga 1 shtetas. Ky shtetas është kapur nga shërbimet e Policisë, në aksin rrugor Pogradec-Librazhd, pranë vendit të quajtur "Lumi i Tërhanit", duke transportuar në drejtim të Tiranës, me mjetin tip "Benz", 4 emigrantë të paligjshëm, të cilëve, kundrejt fitimit 215 euro për secilin, iu kishte premtuar kalimin drejt vendeve të BE-së. Hetimet tashmë po vijojnë nga Prokuroria e Pogradecit, për të zbardhur nëse ka apo jo persona të tjerë të implikuar në këtë rrjet kriminal.