Fatmir Hoxhaj që u arrestua dy ditë më parë për vrasjen e Ahmet Toskës, si autor i dyshuar ka mohuar akuzën. Hoxhaj u përball paraditen e kësaj të mërkure me trupin gjykues të Gjykatës së Fierit, ku dëshmisë së tij i kundërvuri një fakt, që nuk u mor parasysh nga gjykata. Ai tha se ditën e vrasjes, për të cilën është njohur përmes mediave është ngritur nga gjumi në orën 8 të mëngjesit, ndërsa krimi ka ndodhur në orën 6 të mëngjesit. Por, duket se alibia e tij nuk është marrë në konsideratë nga trupi gjykues, që bazuar në kërkesën e prokurorisë e ka lënë në burg pa afat. Edhe pse pretendoi se nuk ka prova që të fajësohet për vrasjen e Ahmet Toskës, ai do të qëndrojë në masën e sigurisë arrest në burg. Në hyrje të gjykatës ndodheshin familjaret e tij, të cilët i kanë folur të ndaluarit italisht dhe shqip, pasi jetojnë në Itali. Ngjarja për të cilën akuzohet Fatmir Hoxhaj ka ndodhur në 26 tetor në lagjen “Sheq i Madh” në Fier, ku Ahmet Toska 50 vjeç, u ekzekutua me armë zjarri, teksa po shoqëronte gruan për në punë. Ngjarja ndodhi pranë banesës së tij dhe autori fill pas krimit u largua nga vendngjarja.