Kryeministri i Kosovës, Albin Kurti, tha se partnerët kyçë tregtarë të Kosovës janë vendet e Bashkimit Evropian. Në samitin për investimet në Ballkanin Perëndimor, të mbajtur në Londër, Kurti u pyet për partneritetin tregtar me shtetet që nuk e njohin Kosovën. Ai tha se një prej tyre është Rusia, me të cilën, Kosova, sipas tij, nuk do partneritet. “Partnerja jonë kyçe tregtare është BE-ja dhe ne duam që ta forcojmë dhe thellojmë këtë bashkëpunim”, tha Kurti në samitin e organizuar nga Banka Evropiane për Rindërtim dhe Zhvillim. “Ne nuk kemi raporte me Federatën Ruse, ne i kemi vendosur sanksione Federatës Ruse. Ne duam që Ukraina të fitojë dhe duam që e gjithë Evropa demokratike dhe bota të shohim Kremlinin dhe presidentin despot, Vladimir Putin, të mposhtur. Nuk bashkëpunojmë me ta, edhe nëse ata do të donim, nuk duam ne. Kemi disa importe nga Kina, por shtetet e BE-së janë partneret tona kyçe tregtare", shtoi ai. Gjatë panelit të diskutimit, ku morën pjesë gjashtë kryeministrat e shteteve të rajonit të Ballkanit Perëndimor u tha se përmirësimi i infrastrukturës rrugore, hekurudhore e detare, tranzicioni tek energjia e gjelbër, por edhe zbatimi i reformave për përmirësimin e mjedisit biznesor janë prioritetet kyçe të këtyre vendeve, përsa i përket tërheqjes së investimeve të huaja.