Kompania për projektin e gazsjellësit mes Rusisë dhe Gjermanisë ka shpallur falimentin, ndërsa punonjësit janë pushuar nga puna. Lajmi u bë me dije nga drejtoresha e departamentit të ekonomisë Silvia Thalmann-Gut, në një intervistë për një media të huaj. Kjo e fundit u shpreh se rreth 110 persona kanë humbur punën e tyre, si pasojë e këtij falimenti. Kjo gjë erdhi pas sanksioneve ndërkombëtare të dekretuara pas pushtimit të Ukrainës nga Rusia. Rreth një jave më parë, kancelari gjerman Olaf Scholz njoftoi se ai po pezullonte autorizimin për tubacionin e diskutueshëm të gazit Nord Stream 2 që lidh Rusinë me Gjermaninë, pas njohjes nga Moska të pavarësisë së provincave pro-ruse ukrainase dhe paralajmëroi "sanksione të tjera". Të mërkurën e kaluar, presidenti amerikan Joe Biden ndoqi shembullin, duke dekretuar gjithashtu sanksione kundër kompanisë me bazë Zug. Tubacioni i gazit nënujor prej 1,230 kilometrash, 11 miliardë dollarë, u përfundua në fund të vitit 2021, por ende nuk ishte vënë në punë, në pritje të certifikimit nga Gjermania.