Ka mbërritur pasditen e kësaj të shtune në portin e Durrësit jahti “Opera” i sheikut Abdullah bin Zayed Al Nahyan, ministër i Jashtëm i Emirateve të Bashkuara Arabe dhe anëtar i familjes mbretërore të Emirateve të Bashkuara Arabe. “Opera Yacht” është një nga superjahtet më të mëdha në botë, me një vlerë prej 450 milion dollarësh, i prodhimit të vitit 2022. Jahtet turistike vijojnë ta shohin vendin tonë si stacionin më të preferuar në rajon për t’u furnizuar me karburant. Të premten një tjetër jaht I një nga emrave më të njohur në botë, Jeff Bezos ndaloi në Portin e Durrësit për t’u furnizuar me naftë. Superjahti ndaloi në portin më të madh shqiptar për t’u furnizuar me 170 mijë litra karburant, para se të riniste lundrimin drejt Italisë. Me një vlerë prej 500 milion dollarësh, një gjatësi 127 metra dhe prodhim i vitit 2023, ai është jahti i dytë më i madh me vela në botë. Jahti iu dorëzua miliarderit të Amazon në Majorka në prill të këtij viti dhe përdor energjinë kinetike të gjeneruar nga velat, por si shumica e jahteve me vela, ai përdor dhe fuqinë motorike të furnizuar nga karburanti.