Autoriteti Kombëtar i Ushqimit ka njoftuar se i ka vendosur 4 gjoba një biznesi në Shkodër pasi subjekti nuk ka zbatuar bllokimin e misrit të konstatuar me aflatoksinë dhe e ka lëvizur atë pa dokumentacion. Ndërkohë me anë të njoftimit zyrtar bëhet me dije se u nisën procedimet disiplinore për 3 inspektorë të AKU Shkodër për lëshime në detyrë. ‘Ky subjekt ka vepruar në kundërshtim të hapur me ligjin duke prishur me dashje shenjat e sigurisë dhe duke lëvizur sasinë e pasigurt pa asnjë dokumentacion gjurmueshmërie, veprime për të cilat AKU ka reaguar me vendosmëri të plotë duke vendosur katër masa administrative “Gjobë” dhe duke depozituar kallëzim penal pranë organeve të drejtësisë prishje me dashje të shenjave të sigurisë, vendosje në qarkullim të ushqimeve të rrezikshme dhe mashtrim me produktet ushqimore.’ – thuhet në njoftimin zyrtar të AKU. Në pritje të publikimit të analizave, subjekti në fjalë akuzohet se ka shkelur përsëri ligjin, duke 'prekur' produktet e bllokuara nga Autoriteti Kombëtar i Ushqimit.