Kryeministri Edi Rama në profilin e tij në Facebook ka prezantuar sot kandidaten për deputete në Tiranë, Luljeta Bozo, e cila së fundi shkaktoi jo pak debat pas deklaratave që bëri në lidhje me regjimin e Enver Hoxhës. Ndërsa në videon e publikuar mëngjesin e sotëm, teksa bën një përshkrim të vetes, Bozo tregon se prioritetet e saj janë përmirësimi i gjendjes së pensionistëve, por edhe kërkim shkencor. “Për moshën që kam them që kam akoma për të përmirësuar pak gjendjen e pensionistëve dhe për t’i aktivizuar në disa probleme shoqërore ku ata do ta ndiejnë veten shumë mirë dhe shumë të dobishëm për shoqërinë. Fushën e dytë që kam si prioritet është fusha e kërkimit shkencor, kjo do të jetë e bashkëngjitur me zhvillimin e arsimit të lartë se s’mund të zhvillohet arsimi i lartë pa kërkimin shkencor”. Sa i takon kandidimit për deputete, Bozo shprehet se ka marrë shumë vlerësime dhe falënderime nga njerëzit. “Takoj njerëz pa fund, nuk i njoh fare më japin urimet, më japin falënderimet që pranova të kandidoj dhe urimet për t’i përfaqësuar. Në këto urime e falënderime në një vit e gjysmë, shumë shumë herë shprehnin dhe dëshirën që ne duam kështu njerëz që t’i kemi të na përfaqësojnë”