Babë e bir janë vënë në prangat e policisë së Durrësit këtë të hënë, pasi kishin kthyer katin e katërt të banesës në shtëpi bari. Nëpërmjet një njoftimi zyrtar, policia e Durrësit bën me dije se në pranga kanë rënë edhe 3 punonjës të OSHEE për shpërdorim detyre e moskallëzim krimi. Sherif dhe Igli Kola, nabë e bir, kishin përshtatur me llamba ambientin në të cilën kishte lidhje të paligjshme të energjisë elektrike, për të rritur bimët narkotike, ku ishin mbjellë 254 të tilla. Policia ka mundur të sekuestrojë bazën materiale që shërbente për kultivimin e kanabisit me anë të ngrohjes, për të cilën lidhja eletrike ishte e paligjshme. Blutë e Durrësit po ashtu kanë sekuestruar edhe 15.1 kg kanabis që ishin gati për t’u shitur. Materialet do t’i kalojnë Prokurorisë, për veprime të mëtejshme dhe zbardhjen e ngjarjes, thuhet në njoftimin zyrtar.