Arrestohet, Sofokli Shano, mbi emrin e të cilit rëndon ngjarja, që tronditi Lushnjën mesnatën e 2 Qershorit. Dëshmia e tij si dhe e të mbijetuarit të vetëm nga ngjarja, do të shërbejë si provë thelbësore për zbardhjen e dinamikës së plotë të ngjarjes. Megjithatë nga informacionet e deritanishme, mësohet se vrasja është kryer në banakun e lokalit në pronësi të Rako Qorrit, 62 vjeç dhe të birit, Klejdi Qorri, 31 vjeç. Një gotë raki e një gotë birrë, ka qenë molla e sherrit mes tyre dhe Sofokli Shanit. Pas konfliktit me dy pronarët e lokalit, Shani është drejtuar tek banesa e tij, ku ka rrëmbyer armën e zjarrit dhe është rikthyer sërisht në vendngjarje për të shënuar aktin fatal. Gjithë ngjarja është zhvilluar nën efektin e alkoolit. Si pasojë 62 vjeçari, Rako Qorri ka humbur jetën ndërkohë i biri ndodhet në spital, në gjendje të rëndë. Autori pas kryerjes së krimit është vetëdorëzuar në polici së bashku me armën e zjarrit. Burimet bëjnë me dije se as autori i ngjarjes, as dy pjestarët e familjes Qorri, nuk kanë pasur precedent të mëparshëm penal. Policia po vijon hetimet në vendngjarje për detaje të reja që mund të zbardhin plotësisht ngjarjen.