Agjencia Evropiane e Hapësirës (ESA) ka bërë të ditur se është duke monitoruar nga afër një asteroid me madhësinë e një fushe futbolli që mund të godasë Tokën në pak më shumë se shtatë vjet. Asteroidi, i quajtur 2024 YR4, vlerësohet të ketë një në 83 mundësi për një goditje të drejtpërdrejtë, duke shkaktuar "dëme të rënda në një rajon lokal", sipas ESA-s. Shkëmbi hapësinor, i cili ka përmasa 100 me 40 metra, aktualisht ndodhet në një distancë prej rreth 44 milionë kilometrash dhe po largohet nga planeti. Por rruga e tij do të kalojë në orbitën e Tokës sërish më 22 dhjetor 2032. Me shumë mundësi mund të ndodhë që asteroidi të kalojë brenda disa mijëra kilometrave larg tokës por shkencëtarët shqetësohen edhe për një skenar tjetër të mundshëm që do të ishte katastrofik. Grupi Këshillues i Planifikimit të Misionit Hapësinor, i cili kryesohet nga ESA, do të diskutojë vëzhgimet e fundit të asteroidit në një takim në Vjenë javën e ardhshme. Nëse rreziku i ndikimit konfirmohet, Grupi do të bëjë rekomandime zyrtare për Kombet e Bashkuara dhe mund të fillojë puna për opsionet për një "përgjigje ndaj rrezikut të mundshëm", tha agjencia në një deklaratë. Pak më shumë se dy vjet më parë NASA dërgoi një anije kozmike në asteroidin Dimorphos, 160 metra të gjatë dhe ndryshoi me sukses orbitën e tij. Në atë kohë, administratori i NASA-s, Bill Nelson, tha: "Të gjithë ne kemi përgjegjësi për të mbrojtur planetin tonë. Në fund të fundit, është i vetmi që kemi." Asteroidi 2024 YR4 u pa për herë të parë nga një teleskop në Kili. Që nga fillimi i janarit, astronomët kanë ndjekur asteroidin për të vlerësuar madhësinë dhe lëvizjen e tij. Asteroidi pritet të zhduket nga pamja brenda disa muajve ndërsa lëviz më larg nga Toka. Toka goditet drejtpërdrejt nga një asteroid i kësaj madhësie vetëm një herë në disa mijëra vjet. Në vitin 1908, një asteroid pak më i vogël, që mendohet se kishte një gjatësi prej 60 metrash, shpërtheu mbi Siberi. Ai rrafshoi 80 milionë pemë në një sipërfaqe prej 830 miljesh katrorë.