Policia e Tiranës ka hetuar dhe goditur dy raste mashtrimi me shitjen e apartamenteve, duke vënë në pranga dy të dyshuarit. Për të njëjtat raste është shpallur në kërkim dhe një notere që i ka dhënë ndihmë një prej të ndaluarve që të falsifikonte dokumentet e nevojshme. Pas hekurave kanë përfunduar Marjo Qose dhe Nani Kolovani, kurse në kërkim është shpallur noterja Majlinda Demollari. Sipas policisë Marjo Qose i ka marrë një shtetasi 75 mijë euro, përmes mashtrimit se do të blinte një apartament në kryeqytet, ndërsa Nani Kolovani rezulton të ketë shitur dy herë apartamentin e tij. Ndërkohë është shpallur në këkrim noterja Majlinda Demollari e cila ka përpiluar 2 kontrata shitjeje për të njëjtën pronë. Policia po punon për kapjen e saj. Operacioni koduar “Apartamentet” u zhvillua nga Seksioni për Hetimin e Krimeve Ekonomiko-Financiare. Rasti i ka kaluar në shqyrtim Prokurorisë së Tiranës për hetime të mëtejshme.