Ka nisur prej kësaj të premteje në të gjitha universitet e vendit, regjistrimi i studentëve që do të ulen në auditorë. Maturantët fitues kanë afat deri më 11 Shtator, nëpërmjet 7 fazave 48-orëshe, të mund të regjistrohen në fakultetet përkatëse. Ministrja e Arsimit dhe Sportit, Ogerta Manastirliu, përmes një postimi në FaceBook, teksa iu uron suksese studentëve, shpjegon edhe hapat që duhet të ndjekin për regjistrim në degën që kanë fituar. Çdo maturant i shpallur fitues ka 48 orë kohë për t’u regjistruar, përndryshe vendi i tij i kalon automatikisht një kandidati në pritje. Maturantët mund të ndjekin në kohë reale, renditjen e tyre në degët fituese përmes portalit e-Albania.