Kosova filloi këtë të premte procesin e regjistrimit të popullsisë, që do të zhvillohet nga data 5 prill deri më 17 maj. Por teksa autoritetet kanë kërkuar nga të gjithë qytetarët që t’I përgjigjen këtij procesi, Lista Serbe, partia më e madhe e serbëve në Kosovë, ka lajmëruar se nuk do të marrë pjesë. Lajmi është dhënë nëpërmjet një postimi në rrjetet sociale, ku pretendohet për repression nga Kurti me qëllim pastrimin etnik të serbëve të Kosovës. "Të nderuar qytetarë, duke marrë parasysh represionin shumëvjeçar të regjimit të Albin Kurtit mbi popullin tonë në Kosovë, me qëllim të spastrimit etnik të çdo gjëje serbe nga këto treva, duam t'ia themi qartë Albin Kurtit dhe atyre që e përkrahin se populli serb nuk do të marrë pjesë në regjistrimin e ardhshëm të rremë, gjë që ai dëshiron të konfirmojë suksesin e tij të turpshëm në dëbimin e serbëve", thuhet në njoftim.