Byroja Kombëtare e Hetmit e njohur ndryshe si FBI-ja shqiptare apo edhe Prokuroria e Posaçme, SPAK tashmë do të kenë akses të plotë, të menjëhershëm e të pafiltruar në llogaritë bankare të zyrtarëve të lartë, të cilët akuzohen për pasuri të pajustifikuar. Lufta ndaj krimit të organizuar, korrupsionit të zyrtarëve të lartë dhe pastrimit të parave shihen problematika themelore që po mban peng procesin integrues të Shqipërisë në Bashkimin Europian. Këshilli i Ministrave ka miratuar një vendim, i cili i jep SPAK dhe Byrosë Kombëtare të Hetimit akses të plotë në të dhënat e regjistrit qëndror të llogarive bankare. Mënyra sesi do të funksionojë aksesimi në llogaritë bankare të këtyre personave është nëpërmjet kodeve hyrëse, të cilat garantojnë anonimitetin e identitetit të përdoruesit. Drejtoria e Përgjithshme e Parandalimit të Pastrimit të Parave dhe Shërbimi Informativ i Shtetit duhet të paraqesin kërkesë për pajisje me kodet hyrëse pa zbuluar identitetin e përdoruesit. Në këtë mënyrë, përdoruesit duhet të përdorin të dhënat e përfituara nga regjistri vetëm për qëllime të përmbushjes së detyrave funksionale, duke zbatuar legjislacionin në fuqi. Ekstrakti i rezultatit të kërkimit në regjistër mundësohet on-line menjëherë dhe mund të shkarkohet apo të printohet nga përdoruesit i firmosur në mënyrë digjitale nga Drejtoria e Përgjithshme e Tatimeve-thuhet në vendimin e miratuar nga Këshilli i Ministrave. Ky vendim hyn në fuqi menjëherë pas botimit në “Fletoren zyrtare”.