Ka përfunduar në pranga sanitarja e spitalit Covid 2, Tire Alldervishi pas skandalit të publikura në një emision investigativ ku rezultoi se ajo i mori një qytetareje 8 mln leke në këmbim të shërbimit që do t’i ofronte nënës së saj të sëmurë me koronavirus. Alldervishi kishte mashtruar qytetaren dhe ishte shtirur si infermiere, duke i marrë plot 8 milionë lekë për t’i shpëtuar nënën 55-vjeçare, së cilës nuk i kishte bërë asnjë shërbim, madje nuk i kishte dhënë as ushqim, duke e lënë të vdiste. Në bisedat mes nënës dhe vajzës duket qartë se asaj i mungonin shërbimet më minimale, dhe ryshfetet e dhena nuk kishin ndyshuar asgjë në shërbimin që i ishte ofruar nga stafi i spitalit covid 2. Pas vdekjes së nënës vajza ka kontaktuar sërish me sanitaren mashtruese, duke i kërkuar që t’i kthente paratë që i kishte marrë. Denoncimi i qytetares tronditi mbarë opinionin publik, ndërsa Ministria e Shëndetësisë shkarkoi menjëherë sanitaren dhe urdhëroi hetim të plotë të ngjarjes.