Një 36 vjeçar është arrestuar këtë të martë në Lezhë, pasi në banesën e tij u gjend një sasi lënde plasëse. Gjatë kontrollit të ushtruar në banesën e 36 vjeçarit, të ndodhur në fshatin Manati të Lezhës, shërbimet e Policisë kanë gjetur dhe sekuestruar në cilësinë e provës materiale një sasi të dyshuar me lëndë plasëse. Në vijim të kontrolleve të ushtruara në gjithë qarkun Lezhë, me qëllim parandalimin, evidentimin dhe goditjen e veprimtarisë kriminale në fushën e armëmbajtjes pa leje apo lëndëve plasëse, bazuar dhe në informacionet e marra në rrugë operative se në rrugën dytësore në fshatin Manati, Lezhë, një shtetas mbante në banesën e tij, lëndë plasëse, gati për ta shitur, nga shërbimet e Policisë Lezhë u organizua puna dhe si rezultat u bë kapja dhe arrestimi i 36 vjeçarit. Ndërkohë, materialet hetimore iu referuan Prokurorisë së Rrethit Gjyqësor Lezhë, për veprime të mëtejshme.