13 vjet pas shpërthimit tragjik në fabrikën e demontimit të armëve në Gërdec, ku humbën jetën 26 persona pr familjarët e viktimave drejtësia nuk është vënë në vend. Përmes një reagimi shoqata e familjarëve të viktimave në këtë ditë që përkujton ngjarjen e rëndë ka theksuar se drejtësia u sprovua dhe dështoi me këtë çështje. “Pavarësisht se disa persona u dënuan, ata tashmë i lanë duart nga drejtësia dhe shumë të tjerë nuk u hetuan. Dëgjuam lloj-lloj emrash kafshësh që u përfolën, që lanë gjurmë mbi letra e fakse, por nuk pati askush kurajon të hetonte e ta zbardhte ngjarjen. Drejtësia e la të pagjykuar edhe ish ministrin që sot kandidon për deputet. Pra, drejtësia nuk kapi as baxhanakët e djeshëm dhe as kunetërit e sotëm. Madje drejtësia ngatërroi edhe emrin e personit që i vuri zjarrin barutit. Drejtësia i la të lirë t’i ktheheshin biznesit apo politikës, që të ndërtojnë pallate për të qerasur politikën dhe kjo e fundit të qeverisë rehat pallatet. Jetët e humbura në 15 mars 2008 nuk kthehen më, por drejtësia mund të vendosej, me hir ose pahir. Me refome drejtësie apo jo”, thuhet në reagimin e shoqatës së familjarëve të viktimave të Gërdecit. Duke e vënë gishtin e akuzës mbi politikën shoqata thekson se ortakëria politike nuk deshi të bëhej drejtës dhe se nuk u nxor asnjë leksion nga kjo tragjedi. sipas familjarëve të viktimave, nuk pati rishikim të ligjeve me qëllim që hetimet të bëheshin ashtu sic duhet. “Madje, edhe reforma në drejtësi i vuri “tapën” çështjeve të vjetra, të kohës para reformës, që të mbyllte esapet e vjetra me qëllim që t’i hapte rrugë pazareve të reja. Sot, ne denoncojmë shëmtinë e politikes, që bëjnë sikur ishin dhe janë me ne kur në të vërtetë kanë bërë të gjitha përpjekjet për të na penguar në gjykatat vendase apo edhe në Strasburg, që ne të humbim të fundit amanet të atyre që nuk jetojnë më dhe të fitojnë ata që sot riciklohen në politikë si gjoja “kundërshtarët” e tyre. Ne familjarët e viktimave të shpërthimit të Gërdecit, i themi vrasësve që pavarësisht se mund të mendojnë që i kanë mbyllur hesapet me drejtësinë apo me ndonjë ambasadatë, ata nuk i kanë mbyllur hesapet me ne dhe me popullin e thjeshtë të këtij vendi. Njohja e krimit dhe vënia e drejtësisë në vend i bën nder atyre që e bëjnë këtë dhe na vë në paqe ne viktimave të krimit” përfundon reagimi i familjarëve të viktimave që shkakoi tragjedia e Gërdecit në 15 marsin e 2008-ës.