Departamenti amerikan i Shtetit ka propozuar që aplikantët për viza biznesi dhe turistike për të hyrë në SHBA, duhet të dorëzojnë garanci deri në 15.000 dollarë. Në një njoftim që do të publikohet në Regjistrin Federal, DASH thekson se do të nisë një program testues 12-mujor, sipas të cilit, njerëzve nga vende që konsiderohen me shkallë të larta të qëndrimeve të paligjshme pas skadimit të vizës dhe me mangësi në kontrollin e dokumenteve të brendshme, mund t’u kërkohet ta dorëzojnë një garanci prej 5.000, 10.000 ose 15.000 dollarësh kur aplikojnë për vizë. Programi testues do të hyjë në fuqi brenda 15 ditëve nga publikimi zyrtar. Propozimi vjen ndërkohë që administrata Trump po ashpërson kërkesat për aplikantët për viza. Gjithashtu, vendet që preken do të renditen sapo të hyjë në fuqi programi. Javën e kaluar, Departamenti i Shtetit njoftoi se shumë aplikantë për rinovim vizash do të duhet t’i nënshtrohen një interviste shtesë personale, gjë që më parë nuk kërkohej. Përveç kësaj, DASH po propozon që aplikantët për programin e Lotarisë së Vizave të kenë pasaporta të vlefshme nga vendi i tyre i shtetësisë.