Policia rrugore përmes njësive operacionale në të gjithë vendin ka vijuar kontrollet intensive ndaj përdoruesve të rrugës duke përdorur dronë, radarë, kamera, aparate fotografike dhe makina të paloguara. Përveç shkeljeve të konstatuara nga patrullat e policisë, falë denoncimeve te qytetarëve janë ndëshkuar me masë administrative 1789 drejtues mjetesh, për shkelje që janë rrezik potencial për përfshirje në aksidente rrugore, si parakalime e manovra të rrezikshme në rrugë, shpejtësi tej normave të lejuara, përdorim të celularit gjatë drejtimit të mjetit, mosvendosje të rripit të sigurimit apo kaskës mbrojtëse, drejtim mjeti nën ndikimin e alkoolit apo pa leje drejtimi. Po ashtu janë pezulluar 35 leje drejtimi, nga të cilat 26 për drejtim mjeti me shpejtësi tej normave të lejuara, që varionte nga 78 km/h në qendrat e banuara deri në 179 km/h në rrugën interurbane Vlorë-Fier, dhe 9 për drejtim mjeti nën ndikimin e alkoolit.Vetëm në territorin e Tiranës gjatë 24 orëve të fundit janë vënë në pranga 17 drejtues mjetesh, nga të cilët 6 për drejtim mjeti në gjendje të dehur dhe 11 për drejtim mjeti pa patentë. Gjatë kontrolleve me qëllim konstatimin dhe verifikimin e shkeljeve që janë burim për aksidentet rrugore, efektivët krahas procedimit administrativ për shkeljet e konstatuara, kanë arrestuar në kushtet e flagrancës 3 drejtues mjetesh, për veprën penale “Korrupsioni aktiv ndaj personave që ushtrojnë funksione publike”, pasi kanë tentuar që të korruptojnë punonjësit e Policisë Rrugore. Dy prej drejtuesve të mjeteve që kanë tentuar të ofrojnë rushfet kanë qenë në gjendje të dehur, ndërsa i treti lëvizte me shpejtësi tej normave të lejuara. Falë telefonatës së qytetarëve në bulevardin “Dëshmorët e Kombit” janë ndaluar dy drejtues mjetesh që kryenin manovra të rrezikshme në rrugë dhe ndaj tyre janë vendosur gjoba 40.000 lekë të rinj, pasi kishte gjoba progresive dhe tjetri me 20.000 lekë të rinj. Një tjetër rast është denoncuar në Mat ku një drejtues mjeti po kryente manovra të rrezikshme në rrugë duke qarkulluar në sens të kundërt. Patrullat e policië u vunë në ndjekje dhe arrestuan në flagrancë drejtuesin e mjetit që ishte në gjendje të dehur dhe më herët ishte përplasur me një motomjet dhe vijonte lëvizjen duke rrezikuar jetën e përdoruesve të tjerë të rrugës.