Thatësira që shoqëroi pjesën më të madhe të vitit 2025 uli ndjeshëm prodhimin vendas të energjisë, duke detyruar Shqipërinë të rrisë importet për të përmbushur nevojat. Sipas të dhënave zyrtare, KESH shpenzoi rreth 272 milionë euro për blerje energjie në tregun e lirë, në kuadër të detyrimit për furnizimin e konsumatorëve. Gjatë vitit, u blenë 1.81 milionë MWh me një çmim mesatar prej 127.55 euro/MWh. Prodhimi vendas mbuloi vetëm 44.4% të konsumit total, ndërsa konsumi kombëtar arriti mbi 8.34 milionë MWh. Rënia u ndikua kryesisht nga performanca më e dobët e hidrocentraleve, ndërsa një pjesë e furnizimit u sigurua edhe nga operatorë të tjerë dhe burime alternative. Megjithëse reshjet në fund të vitit përmirësuan situatën hidrike, bilanci mbeti negativ. Prodhimi nga hidrocentralet publike dhe private ra, ndërsa i vetmi sektor në rritje ishte ai fotovoltaik, që pothuajse u dyfishua krahasuar me një vit më parë.