Ambasada e Shteteve të Bashkuara në Sarajevë ka thënë të premten se propozimi i Qeverisë së Republikës Sërpska (RS) për t’u ndarë nga Bosnja e Hercegovina, është i rrezikshëm dhe i papërgjegjshëm dhe se një gjë e tillë “nuk do të nënkuptonte pavarësi, por fund për Republikën Sërpska”. Të enjten, Qeveria e Republikës Sërpska tha se në 30 ditët e ardhshme ajo do të krijojë një marrëveshje që do t'i dërgohet entitetit tjetër të Bosnjës, Federatës së Bosnjës e Hercegovinës, për "ndarje paqësore". Qeveria e Republikës Sërpska e bëri këtë propozim gjatë një mbledhjeje të mbajtur në prag të seancës së Asamblesë së Përgjithshme të Kombeve të Bashkuara, ku u miratua rezoluta që e shpall 11 Korrikun Ditë Ndërkombëtare të Përkujtimit të Viktimave të Gjenocidit në Srebrenicë. Ambasada amerikane tha se ky propozim është në mospërputhje me Marrëveshjen e Dejtonit dhe se “vë në rrezik sovranitetin dhe integritetin territorial dhe karakterin shumetnik të Bosnjës”. “Këto janë interesa thelbësore të SHBA-së. Shtetet e Bashkuara do t’i mbrojnë dhe ruajnë ato, mes tjerash, duke i konsideruar përgjegjës ata që i rrezikojnë ato”, thuhet në komunikatë. Ajo akuzoi Millorad Dodik, presidentin e Republikës Sërpska dhe Qeverinë e kësaj republike, se janë përpjekur ta justifikojnë këtë vendim bazuar në “gënjeshtra dhe dezinformata, me qëllim që të frikësojnë popullin në Republikën Sërpska, që t’i mbështesin ata në këtë rrugë të rrezikshme”. “Faktet janë të thjeshta dhe të drejtpërdrejta. Nuk ka konspiracion ndërkombëtar për të ndarë Republikën Sërpska dhe Dodik nuk mund ta gjejë asnjë deklaratë ku një zyrtar amerikan bën thirrje për shuarjen e Republikës Sërpska”, thuhet ndër të tjera në deklaratë. Veprimet e Dodik, sipas Ambasadës, rrezikojnë të ardhmen brenda institucioneve euroatlantike që e do populli i Bosnjës, përfshirë Republikën sërpska.