Koreja e Jugut ka miratuar një ligj të ri, i cili synon që deri në vitin 2027 të ndalojë plotësisht prerjen dhe shitjen e qenve për mishin e tyre. Ky ligj ka për qëllim t’i japë fund traditës shekullore të ngrënies së mishit të qenit. Sipas ligjit të ri, ndalohet rritja apo therja e qenve për ngrënie, njëlloj siç nuk lejohet as shpërndarja apo shitja e mishit të tyre. Kushdo që shpallet fajtor për një vepër të tillë, mund të përfundojë në burg. Sondazhet e fundit kanë treguar se më shumë njerëz tani dëshirojnë që tregtimi i mishit të qenit të ndalohet dhe shumica e koreanojugorëve nuk hanë më mish qeni. Megjithatë, sondazhet gjithashtu tregojnë se një në çdo tre koreanojugorë akoma e kundërshtojnë ndalimin e mishit të qenit, edhe pse nuk e hanë atë. Të martën, Parlamenti koreanojugor e kaloi ligjin me 208 vota pro dhe asnjë kundër. Qeveria e presidentit Yoon Suk Yeol e mbështet ndalimin e mishit të qenit, prandaj miratimi i ligjit ishte formalitet.