Policia në Italinë e jugut ka mundur të gjejë një kuti me shufra ari në një impiant të grumbullimit të mbeturinave, pasi një banor i hutuar e hodhi aksidentalisht thesarin bashkë me plehrat e shtëpisë së tij, thanë oficerët. Burri hyri në një stacion policie të Karabinierëve në Porto Cesareo, pranë qytetit të Leçes, për të raportuar se kishte humbur një kuti druri që përmbante 20 shufra ari, me vlerë rreth 120,000 euro, tha policia në një deklaratë. Hetuesit gjurmuan shpejt lëvizjet e burrit, i cili nuk u identifikua, dhe shqyrtuan pamjet e kamerave të sigurisë. Imazhet sugjeronin se kutia ishte hedhur në një kosh publik në një plazh aty pranë, dhe hetimet e mëtejshme zbuluan se ishte transferuar në impiantin lokal të asgjësimit të mbeturinave. "Pas disa orësh kërkimi të kujdesshëm, oficerët arritën të gjenin kutinë e cila, megjithëse e dëmtuar, ende përmbante të gjitha shufrat e arit... të cilat më pas iu kthyen pronarit të tyre të ligjshëm", thuhej në deklaratën e policisë.