Tre prona të ish-Sekretarit të Përgjithshëm të Këshillit të Europës, Thorbjorn Jagland u kontrolluan nga policia norvegjeze, ndërsa autoritetet njoftuan se ai pritet të merret në pyetje së shpejti. “Ish-kryeministri i Norvegjisë akuzohet për “korrupsion të rëndë” për lidhjet e tij me të akuzuarin për krime seksuale, Jeffrey Epstein”, ka thënë policia norvegjeze, sipas asaj që raporton “BBC”. Akuza është ngritur zyrtarisht pasi Këshilli i Europës i hoqi imunitetin Jaglandit, të cilin ai e gëzonte për shkak të rolit të tij të mëparshëm diplomatik. Në e-mailet e publikuara nga Departamenti i Drejtësisë i SHBA-së tregojnë se Jagland planifikoi vizita individuale dhe familjare në shtëpitë e Epsteinit në Paris, New York dhe Palm Beach, edhe pasi Epstein kishte marrë një dënim për krim seksual me të mitur, në vitin 2008. Epstein u dënua me 18 muaj burgim. Në dosjen “Epstein” rezulton se financieri kishte mbuluar shpenzimet e udhëtimit për në pronat e tij të Jaglandit dhe familjes së tij. Po ashtu në dosje u zbulua se Jagland në vitin 2012 i kishte dërguar Jeffrey Epstein një e-mail, ku shkruante: “Isha në Tiranë, ka vajza të jashtëzakonshme”. Ai shërbeu si sekretar i përgjithshëm i Këshillit të Evropës për një dekadë, nga viti 2009 deri në 2019. Ish-sekretari i përgjithshëm i Këshillit të Evropës ishte i njohur edhe për deklaratat e tij të ashpra ndaj Kosovës, pasi në vitin 2004 kishte deklaruar se mafia kishte marrë nën kontroll një pjesë të madhe të qeverisjes së Kosovës.