Një dron fluturon mbi një qendër tregtare në qytetin rus të Voronezhit, ndërsa Shaman, një operator i ushtrisë ruse, u tregon blerësve një nga pajisjet që kanë dominuar fushën e betejës në Ukrainë. 19-vjeçari i thotë AFP-së se së shpejti do të largohej për në luftë, duke u zotuar "të mbrojë vendin e tij", i cili nisi një ofensivë në shkallë të gjerë kundër fqinjit të tij katër vjet më parë. Rreth 500 kilometra në jug të Moskës, Voronezhi, një qytet me një milion banorë, është më afër vijës së frontit në Ukrainën lindore sesa kryeqytetit rus. Nga sulmet e shpeshta hakmarrëse të Ukrainës, me dronë, e deri te reklamat e rekrutimit të ushtrisë rreth qytetit, konflikti ka hyrë gradualisht në jetën e përditshme. Para se të nisej për në front, Shamani drejtonte stendën e "Klubit Ushtarako-Sportiv të Kozak Berkut" në qendrën tregtare. Qëllimi i tij nuk ishte "domosdoshmërisht" të bindte adoleshentët e tjerë të shkonin në luftë. "Secili zgjedh rrugën e vet, sipas interesave të tij", tha ai, duke e quajtur veten "patriot". Gjatë katër viteve të fundit, fjala patriot është ngarkuar politikisht - përdoret për të përshëndetur ushtarët dhe, në frontin e brendshëm, ata që mbështesin me zë të lartë Presidentin Vladimir Putin dhe luftën e tij.