Komandanti i Forcave të Përbashkëta Aleate në Napoli, admiral Stuart Munsch, u shpreh pas ceremonisë së ndërrimit të komandës së KFOR-it në Prishtinë, se Ura e Ibrit nuk duhet të hapet në këtë moment, pasi një gjë e tillë mund të shkaktojë rrezik. “Politika e NATO-s mbi urën është që të mos hapet në këtë moment dhe se ajo duhet t’i nënshtrohet dialogut ndërmjet palëve të interesuara. Është një çështje politike në këtë pikë dhe jo një çështje ushtarake. Dhe arsyeja pse nuk do të jetë e hapur tani është për shkak të gjasave që mund të shkaktojë rrezik për mjedisin e qetë dhe të sigurt dhe lirinë e lëvizjes së të gjitha komuniteteve në Kosovë”, tha admirali për mediat. Teksa u pyet për 48 bazat ushtarake të vendosura përreth kufirit me Serbinë, Munsch tha se mandati i KFOR-it në Kosovë është për një mjedis të sigurt, por me sfida të vazhdueshme. Ai deklaroi se ekzistojnë grupe kriminale që veprojnë në këtë rajon. Më tej admirali, theksoi se forcat e sigurisë kanë qenë transparente për aktivitetet e tyre me KFOR-in.