Treguesit e çmimit të naftës në pikat e karburantit në Shqipëri, ndryshojnë thuajsë çdo ditë duke paraqitur një rritje rekord çmimesh. Qytetarët dhe operatorët e transportit publik shprehen se e kanë të pamundur përballimin e rritjes së menjëhershme të çmimit të naftës, i cili është një zë i rëndësishëm në shpenzimet dhe buxhetin e çdo qytetari shqiptar. Në harkun kohor të vetëm një jave, çmimi i tregtimit të naftës ndryshoi plot katër herë. Këtë të mërkurë, një litër naftë blihet me 260 lekë, ndërkohë që një javë më parë tregtohej me 192 lekë. Krahasuar me mesataren e po të njëjtës periudhë të një viti më parë, çmimi i naftës është rritur thuajse me 50 për qind.