Nga dita e nesërme më 15 janar dhe deri më 25 shkurt të këtij viti fermerët në të gjithë vendin do të kenë mundësinë që të aplikojnë për të përfituar naftën me çmim të ulë. Nga ky lehtësim përfitojnë të gjithë fermerët e regjistruar dhe të pajisur me NIPT. Ata do ta marrin naftën me çmim të reduktuar, pasi do të paguajnë çmimin real pas asnjë ngarkesë nga akciza dhe taksat e tjera. Fermerët do të përfitojnë ulje afërsisht 80 lekë për litër nga çmimi normal që ka nafta për qytetarët e tjerë në vendin tonë. Nafta për prodhim bujqësor nuk do të shpërndahet nga pikat e karburanteve, por do të mund të merret tek operatorët furnizues të kontraktuar nga Ministria e Bujqësisë. Në këto pika fermerët paraqiten me kartën individuale, në të cilën është hedhur sasia e naftës që ka të drejtë të tërheqë fermeri përkatës. Për të përfituar nga kjo skemë lehtësuese fermerët duhet të aplikojnë në portalin e-albania. Për të ndihmuar fermerët që të bëjnë aplikimin, nëse ata nuk mund ta bëjnë vetë online mund të shkojnë edhe prane njësive administrative ose drejtorive bujqësore, ku nëpunës të caktuar janë të ngarkuar për ti ndihmuar me procesin. Fermeri vecc dokumentacionit do të deklarojë sipërfaqen e tokës dhe kulturën që do mbjellë. Kjo pasi sasia që ata përfitojnë me me ccmim të reduktuar varion nga sasia e tokës që kanë dhe nga varietet që kultivojnë. Nga ky vendim përfitojnë Fermeret individuale, Shoqerite e Bashkepunimit Bujqesor dhe Personat Fizike apo Juridike qe kryejne veprimtari bujqesore. Dhënia e karburantit do të monitorohet nga Ministria e Bujqësisë e cila ka një njësi të posaçme për të garantuar zbatimin, monitorimin dhe koordinimin e të gjithë procesit që lidhet me skemën e mbështetjes së naftës për bujqësinë. Si dhe do të menaxhojë shpërndarjen e kartave individuale të naftës te subjektet përfituese, si dhe gjurmimin e tërheqjeve të naftës prej tyre. Ndërsa kontrolli në terren për përdorimin e naftës do të bëhet nga AZHBR-ja. Të gjithë ata fermerë që abuzojnë me 20% të sasisë së naftës së përfituar do të përjashtohen nga skema për 3 vite.