Deputeti Lazar Radulloviq, nga Partia për Liri, Drejtësi dhe Mbijetesë, ka akuzuar Listën Serbe, se kjo parti ka tentuar të pengojë zgjedhjen e tij si deputet dhe ta frikësojë përmes presioneve dhe sulmeve. Gjatë fjalimit të tij në Kuvend, Raduloviç tha se u kishte borxh një përgjigje deputetëve të Listës Serbe, të cilët, sipas tij, gjatë procesit zgjedhor ishin ankuar në Gjykatën Supreme me qëllim që të kontestonin kandidaturën e tij. “Problemi i Listës Serbe është që mua nuk mund të më blejnë, e as të më frikësojnë”, deklaroi Radulloviq. Deputeti serb tha se gjatë kohëve të fundit kishte pasur probleme, përfshirë sulme fizike dhe shpërthimin e gomave të automjetit të tij. Ai deklaroi se këto veprime nuk do ta detyrojnë të largohet nga pozita e tij në Kuvend. “E vetmja mënyrë që të më largoni nga ky vend është që të më gjuani me armë. Mënyra tjera nuk ka që mund të ma merrni vendin që e kam në këtë Kuvend”, u shpreh ai. Radulloviq akuzoi gjithashtu Listën Serbe se vepron nën ndikimin e Beogradit, ndërsa organizatën e cilësoi kriminale. Në fund të fjalimit, ai theksoi se nuk do të frikësohet nga presionet.