Sistemet amerikane Typhon, që mund të lëshojnë raketa që arrijnë deri në mijëra kilometra larg, janë vendosur në Filipine dhe do të qëndrojnë atje për momentin, tha të premten këshilltari i sigurisë kombëtare i Presidentit të vendit Ferdinand Marcos Jr. Këshilltari i Sigurisë Kombëtare Eduardo Ano u tha gazetarëve se raketat amerikane do të qëndrojnë në brigjet e Filipineve "për momentin", një ditë pasi Reuters raportoi se lëshuesit u zhvendosën në një vend të ri brenda ishullit Luzon nga bazaa ajrore Laoag në veri. Ushtria filipinase tha po ashtu të premten se vendosja e raketave me rreze të mesme veprimi ishte në përputhje me lidhjet e hershme të mbrojtjes mes SHBA-së dhe Filipineve. “Objektivi kryesor i këtij dislokimi është që të forcojë gatishmërinë ushtarake të Filipineve, të përmirësojë njohjen dhe ndërveprimin tonë me sistemet e avancuara të armëve dhe të mbështesë sigurinë rajonale”, tha në një deklaratë zëdhënësi i forcave të armatosura. Prania e armëve në territorin e Filipineve u prit me reagime të ashpra nga Kina, kur ato mbërritën për herë të parë në prill 2024 gjatë stërvitjeve ushtarake. Pekini akuzoi Filipinet të enjten për krijimin e tensioneve dhe konfrontimit në rajon, duke i kërkuar vendit që të "korrigjojë praktikat e tij të gabuara". Sistemet Typhon mund të lëshojnë raketa deri në mijëra kilometra larg, përfshirë raketat e lundrimit Tomahaëk, të afta të godasin objektivat si në Kinë ashtu edhe në Rusi nga territori i Filipineve. Raketa SM-6 që këto sisteme mbartin, mund të godasë objektivat ajrore ose detare më shumë se 200 km larg.