Qeveria e kryeministrit grek Kyriakos Mitsotakis përballet me një votë mosbesimi të enjten lidhur me trajtimin e një aksidenti treni vitin e kaluar që vrau 57 persona, pasi raportet e mediave këtë javë pretendonin manipulim të provave. Partitë e majta opozitare paraqitën një mocion mosbesimi kundër qeverisë konservatore këtë javë duke e akuzuar atë për "përpjekje për të fshehur të vërtetën" pasi një tren mallrash u përplas kokë më kokë me një tren pasagjerësh në Greqinë qendrore, aksidenti më i rëndë në historinë e vendit. Qeveria mohon të ketë vepruar gabim dhe pritet t'i mbijetojë votimit duke pasur parasysh shumicën që gëzon ajo. Por mocioni thekson se sa i madh vazhdon të jetë zemërimi për fatkeqësinë që nxorri në dritë dekada të tëra neglizhencë dhe keqmenaxhim në sigurinë hekurudhore. Ekspertët thonë se është bërë pak për të përmirësuar standartet që atëherë. "Si çdo qytetar tjetër në vend, ne duam të dimë të vërtetën," tha në parlament të mërkurën Nikos Androulakis, kreu i PASOK. Një hetim është duke u zhvilluar dhe pritet të përfundojë në muajt në vijim. Autoritetet kanë akuzuar dhjetëra njerëz për aksidentin, duke përfshirë një drejtues stacioni i cili është në paraburgim në pritje të gjykimit. Gazeta To Vima raportoi të shtunën se regjistrimi i një dialogu mes drejtuesit të stacionit dhe drejtuesit të trenit, i dalë në media disa orë pas përplasjes, dyshohet se ishte redaktuar për të nxjerrë gabimin njerëzor si shkak i aksidentit dhe jo problemet sistematike në rrjetin hekurudhor.