Pas një seance maratonë që zgjati deri në orët e para të mëngjesit kuvendi miratoi në parim projektbuxhetin 2026 me vlerë 8.8 mld euro. Parlamenti zgjati pothuajse 16 orë, ndërsa nuk munguan debatet mes mazhorancës dhe opozitës që patën qëndirme të kundërta. Në votim morën pjesë 112 deputetë, por Projektligji “Për buxhetin e vitit 2026” mori 83 vota pro dhe 32 kundër. Ndërkohë deputeti socialist Vullnet Sinaj nuk votoi dy projektligjet “Për marrëveshjen e paqes fiskale” dhe “Për fshirjen, shuarjen dhe pagesën e detyrimeve tatimore ndaj administratës tatimore qendrore e të detyrimeve të pagueshme në doganë” të cilat kaluan me 82 vota pro dhe 32 kundër. Po ashtu në seancë u miratuan vetëm me votat e socialistëve dhe pikat e tjera të rendit të ditës. Buxhetin prej 8.8 miliardë eurosh kryeministri Edi Rama e quajti si historik, ndërsa ka theksuar se do të shërbejë për rrritjen e pensioneve, pagave, por dhe do të rrisë shërbimet në shëndetësi si dhe për familjet në nevojë. Sipas mazhorancës ky buxhet pritet të sjellë dhe një rritje reale të investimeve publike. Po ashtu do të jetë një ndihmë edhe pë rbizneset, një pjesë e madhe e të cilëve do të përfitojnë nga paqja fiskale. Por opozita e ka kundërshtuar këtë nisëm me argumentin se qeveria po mbron ata që nuk paguajnë dhe po godet bizneset e ndershme.