Qeveria miratoi në mbledhjen e së mërkurës skemën e rimbursimit të barnave për personat e prekur nga Covid 19 që trajtohen në kushte shtëpie, bazuar në udhëzimin e miratuar nga Komiteti Teknik i Ekspertëve.Vendimi i qeverisë përcakton skemën dhe ndan dy kategori përfituese pacisntësh, duke pasur si referencë kryesore gjendjen e pacientit dhe nevojën e tij për kurimj. Në grupin e parë bëjnë pjesë pacientët me simptoma të lehta të sëmundjes qe sipas qeverisë për mjekimin e marrë do të rimbursohen me vlerën 1650 leke. Ndërsa në grupin e dytë janë përfshirë pacientët me simptoma mesatare të sëmundjes, që përfitojnë paketën e rimbursimit prej 10 900 leke për trajtimin. Ndërkaq vlerësimin nëse një pacient bën pjesë në grupin e parë apo të dytë e bën mjeku i familjes. VKM-ja e qeverisë ka të përcaktuar se rimbursimi për personat me covid, do të bëhet për ata qytetarë që janë konfirmuar si të tillë nga institucionet shendetësore publike. “Mjeku i familjes, për personat e testuar pozitiv për Sars-Cov-2 , në përputhje me formën e sëmundjes dhe indikacionet e përcaktuara në udhëzuesin e miratuar nga Komiteti Teknik i Ekspertëve, lëshon recetën me rimbursim, sipas rregullave të përcaktuara nga Fondi i Sigurimit të Detyrueshëm të Kujdesit Shëndetësor”, thuhet ne vendimin e qeverisë. Çështja e rimburismit të barnave për të sëmurët covid që trajtohen në kushte shtëpie, ka ngjallur mjaft debate dhe është kritikuar ashpër nga opozita. Deri më tani përveç pacientëve që trajtohen ne spitalet covid, pjesa tjetër që janë trajtuar në shtepi kanë paguar të gjitha shpenzimet nga xhepi.