Ministri për Evropën dhe Punët e Jashtme të Shqipërisë Igli Hasani, zhvilloi një vizitë zyrtare në Riga, ku u prit homologja e tij letoneze, Baiba Braže. Takimi rikonfirmoi marrëdhëniet shumë të mira mes dy vendeve dhe vullnetin për të ngritur bashkëpunimin në një nivel më të strukturuar dhe strategjik. “Shoh potencial të madh për të thelluar bashkëpunimin në fusha kyçe si arsimi, siguria kibernetike, turizmi dhe shkëmbimet kulturore. Kjo vizitë është një hap i rëndësishëm drejt ndërtimit të një partneriteti të qëndrueshëm mes Shqipërisë dhe Letonisë,” u shpreh Ministri Hasani I cili falënderoi gjtihshtu Letoninë për mbështetjen e saj të vazhdueshme ndaj Shqipërisë në procesin e integrimit evropian, duke theksuar se: “Qëndrimi parimor i Letonisë në Bruksel nuk ka rëndësi vetëm për Shqipërinë, por për vetë besueshmërinë dhe kohezionin strategjik të Bashkimit Evropian.” “Në kushtet aktuale gjeopolitike, zgjerimi nuk është vetëm një proces transformues – është një domosdoshmëri strategjike. Lufta e agresionit të Rusisë e bën edhe më të qartë se përfshirja e vendeve të Ballkanit Perëndimor është një investim në paqen dhe qëndrueshmërinë e Evropës. Letonia e kupton këtë thellësisht dhe ne e vlerësojmë fort këtë angazhim.”, nënvizoi ministri që gjatë qëndrimit vizitoi edhe kontingjentin shqiptar të Forcave të Armatosura në Kampin Ādaži.