Prodhuesi i automjeteve Nissan raportoi një humbje vjetore neto prej 4.5 miliardë dollarësh, ndërsa paralajmëroi për shkurtim të 15 për qind të fuqisë punëtore në mbarë botën dhe për ndikimin e mundshëm të tarifave amerikane. Prodhuesi i automobilëve, i cili ka borxhe të mëdha dhe nuk arriti këtë vit të bashkohej me kompaninë Honda, po ul ndjeshëm prodhimin si pjesë e një plani të kushtueshëm për ringritjen e biznesit. "Nissan duhet t’i japë përparësi përmirësimit të vetvetes me më shumë urgjencë dhe shpejtësi," tha para gazetarëve drejtori ekzekutiv, Ivan Espinosa. "Realiteti është i qartë. Ne kemi një strukturë shumë të lartë kostosh. Për ta përkeqësuar më tej situatën, mjedisi global është i paqëndrueshëm dhe i paparashikueshëm, çka e bën planifikimin dhe investimin gjithnjë e më sfidues," shtoi ai. Nissan raportoi një humbje neto prej 671 miliardë jenësh ose 4.5 miliardë dollarësh për vitin financiar deri në mars 2025. Humbja më e rëndë vjetore e kompanisë ishte 684 miliardë jenë në vitin 1999-2000, gjatë një krize që çoi në partneritetin me prodhuesin francez të makinave, Renault. Ky i fundit, që zotëron gati 36 për qind të aksioneve të Nissan, tha të martën se pret një humbje prej 2.2 miliardë eurosh në tremujorin e parë për shkak të planit të rikuperimit të kompanisë japoneze. Një bashkim me rivalin japonez Honda shihej si një mundësi shpëtimi, por bisedimet u ndërprenë në shkurt, kur Honda propozoi ta bënte Nissanin një filial të saj. Njohësit e ekonomisë paralajmërojnë ditë më të vështira për Nissan, pasi pritet të ndikohet më rëndë nga tarifa 25 për qind e presidentit amerikan Donald Trump për automjetet e importuara.